هتكلم عن شوية حاجات نفسي اشوفها في الكلية وده طبعا لان أ\ عبد المحسن طلب مننا نتكلم عن مشروع الجوده
أنا شايفة ان الجوده مشروع المفروض نحاول بيه نتغير للأفضل دايما فأنا باحلم -والحلم مش حرام - في شوية حاجات كده نفسي تحصل
أولا بالنسبة للمكان :
نفسي يكون المكان له علاقة بدراستنا يعني فيه حاجة تفكرني دايما بأدرس ايه -أصلي بنسى بسرعة- يعني مثلا اهتممنا بشكل القسم عامة شيئ مهم لازم أي شخص وهو بيزور الكلية يعرف بسرعة بمجرد النظر هو في قسم الاعلام التربوي لوحات عليها معلومات قيمة مكيتات ليها علاقة بالقسم يعني يبقى في روح في الكلية روح تربط الطلبة بالمكان وتحسيسهم بقيمته.
ثانيا بالنسبة للمواد :
نفسي اشوف المواد ليها أهداف واضحة بدرس مقرر كله واضح ومفهوم يعني الكتاب مرتبط ببعضة مش كل فصل من مادة تانية ويكون الكتاب واضح وطباعته جميلة يعني مثلا كنا من سنة بندرس مقرر اسمه تكنولوجيا الاتصال كان الكتاب بيقول ان بعد عشر سنين من المتوقع ظهور تقنيات جديدة بالموبايا مثل الموبايا ذو الكاميرا بجد كنت دايما أحب اذاكر المادة دي علشان أعرف اننا بالفعل عايشين في نعيم ده طبعا بالنسبة للحجات اللي تنبأنا بيها . ونفسي كمان أدرس مواد عملية بجد يعني أمارس المهنة واتعلم حاجات كتير يعني السنة دي لولا المدونة الجميلة دي كانت أكيد الدراسة هتبقى كالعادة بس الحمد لله ربنا عوضنا .
بالنسبة للأعضاء هيئة التدريس :
اتمنى لو يوم حضرت محاضرة وكانت بالفعل مثمرة يعني بنشارك بنقول رأينا بنتناقش لان أكيد من المناقشه هتعلم هشارك هاعرف هنتواصل بالحوار واحضر محاضرات مبتعتدمش على الكتابة انما بتعتمد على الحتة الصغيرة دي الي بيسموها العقل لان انا دايما مؤمنه بان كل واحد جواه فكره معينه ممكن يكون مش عارفها ومهمة المدرس انه يكتشفها يعرفها ينميها وده مش هيحصل من غير نقاش وكمان نفسي احس بان الاساتذة مش بيستخفوا بعقلنا لان أفكارنا ممكن تكون صغيرة بس أكيد هتكبر وتكبر وباذن الله بيها هنغير .
بالنسبة للطلبة :
متستغربوش احنا لازم نصارح نفسنا بأدوانا ونقوم بها لاننا اهم عنصر في الموضوع ده كله الكتب مطبوعة لينا والاساتذة بيجوا علشانا والمباني مبنية لينا شوفوا النعيم اللي احنا فيه .....
المهم احنا كمان لازم نكون فعالين وبلاش سلبية نفسك في حاجة حاول تحققها اسعى ليها أكيد هتوصلها مش ممكن تعبك يضيع بس المهم انك تحاول يعني مش كل حاجة لازم نصعبها على نفسنا نحاول مع بعضنا هنغلط طب ايه اللي فيها ماحنا لازم نغلط علشان نتعلم ونكبر وحلمنا يصبح حقيقة حاول في دراستك تبقى أحسن وفي حياتك تبقى ناجح وفعال مش ممكن من أربع سنين كنت الشاب عادي اللي دخل الكلية وبعد أربع سنين بردوا انت الشاب عادي اللي اتخرجت من الكلية .
ان شاء الله بعدين هشارك بموضوعات عن الجوده وأهدافها وهنستفيد ايه بس الأول حبيت أقول انا شايفة ايه وياريت كلنا نقول نفسنا في ايه لانه ممكن دلوقتي يكون مجرد كلام انما بعد كام سنة ممكن نكون احنا رواد التغير أو حتى المتسببين في التغير هو حلم بس مش بعيد
(ملحوظة: انا من فترة تغيبت عن المدونة لظروف خارجة عن ارادتي بس طبعا لما دخلت قرأت كل الرسائل القديمة وقرأت العتاب الذي كتبه أ\عبدالمحسن بس بجد لم يكن بخلا مني أو اي شيئ فالمدونة أصبحت جزأ من حياتنا بجد-هذا لو كنت ممن اثر غيابهم - )
