أولا وقبل كل شئ.. "كل عام والأمة الاسلامية بخير , وكل عيد أضحى وأنتم طيبين "
ثانيا أقدم إعتذاري الشديد لاسرة المدونة الكرام على تقصيري في حق المدونة الفترة الماضية وخاصة أستاذى الجليل أ\عبدالمحسن الذي أطمع في كرم أخلاقه وقبول أعذاري.....
ثالثا أود الترحيب بأساتذتنا الكرام الذين أنضموا إلى أسرتنا المتواضعة وعذرا على التأخير..
وأسمحوا لي مشاركتكم النقاش حول كيفية الحصول على فرصة عمل "على الرغم من ان هذا سبب تأخري في المشاركة" فالحمد لله أنا أتيحت لي الفرصة للعمل في وظيفة مرموقة بالنسبة لمن هم في سني أوخبرتي والفضل في ذلك بعد فضل الله سبحانه وتعالى لوالدي وأخي الأكبر ومن واقع خبرتي ومعايشتي لجو العمل والتوظيف "حيث أن والدي هو مديري في العمل " أقدم لكم الخلاصة اللي وصلت ليها علشان تلاقي وظيفة في البلد دي أو غيرها...........
أول هام : تهتم بتظبيط نفسك "يعني تنمي نفسك داخليا كويس قوي وتفهم الدنيا ماشية إزاي ؟! وإيه اللي محتاجه السوق وإيه إمكانياتك وتطورها , وإيه نقاط الضعف عندك وتحاول تعدلها ,وتحاول تفهم كويس أنواع الشخصيات اللي هاتتعامل معاها علشان تعرف تسايسها وماتواجهش مشاكل معاها بسبب سوء الفهم منك وهايفيدك في ده مجال التنمية البشرية والcommunications / soft skills
تاني هام :السيرة الذاتية أو ال C.V لازم يكون متظبط شهادات (سواء كورسات تدريبية \ أوشهادات خبرة في أي مجال \أو شهادات حضور ورش عمل أوندوات) تفيدك في المجال اللي هاتتقدم له ومكتوب بأسلوب يوضح أن صاحب الC.V ده هوه ده اللي بندور عليه .. وفيه إتيكيت معين لكتابة السيرة الذاتية علشان تبرز نقاط القوة عندك من السهل أنك تعرفه..
تالت هام : المقابلة أوالINTERVIEW ودي في غاية الأهمية وهيه الأساس في قبولك في الوظيفة أو لأ علشان كده لازم تكون واثق من نفسك ومن إمكانياتك وتسوق لنفسك حلو قوي وتثبت قوة شخصيتك وتخلي في بالك معنى مهم جدا : أن صاحب العمل عايز شخصيات مبدعة ومتطورة وتقدم أفكار جديدة ومفيدة تساعده في شغله لأنه أكيد مش هايوظف حد ويدفعلوا فلوس لمجرد أنه يسد خانه أويكون عماله زايده!! ..
رابع هام : لما ربنا يكرمك بالوظيفة "أوعي تستعجل في موضوع الفلوس " يعني " غالبا ما بتكون اول فترة في الشغل بمثابة أختبار فحاول تثبت نفسك وتبذل كل مافي طاقتك علشان تكسب ثقة أصحاب العمل ..
وقبل كل شئ لازم تدور على المجال الي بتبدع فيه علشان تنجح وتدور في كل الاتجاهات وما تملش وخليك واثق في كرم ربك وأن رزقك هاتأخذه هاتخذه وحاول تستفيد من خبرات الاخرين وتتحرك زي النحلة في كل مكان علشان عالمنا ده مافيهوش مكان للكسالى وماتستناش لما تخلص كليتك علشان تدور على شغل وعلى فكره في وظائف كتير لا تلتزم بالمكان أو الزمان
وربنا يوفق الجميع للخير ...وعذرا على الإطاله ...وكل عام وأنتم بخير ...ودمتم متوظفين...
