أولا بنرحب بأستاذنا أ\هاني نادي في مدونتنا الجميلة ويارب يتفاعل معانا بسرع ومستنين موضوع لسة بنتكلم وان شاء الله هيبقى حاجة جامدة وبجد شكرا يا أ\ عبد المحسن المدونة كل يوم في تقدم وان شاء الله تيقى طريق نغير بيه حاجة .
اليوم هو أكبر شيئ بيبخوفني لاني دايما حاسه اني لازم أكون أكثر استفادة منه بشكل أكبر من كده يومي قبل الجامعة كان أفضل لاني دايما عندي اهتمام بالوقت والاستفادة منه بس فعلا قبل الجامعة كنت أكثر فاعلية وتأثير في المدرسة الثانوية كنت بالفعل بغير أشياء كتير حتى اني كنت بافرح لما تواجهني مشكلة وأحاول أحلها لاني فعلا كنت حاسة اني بالفعل موجودة عايشة لان قيمتي في الحياة ليست بالدرجة ولا التقدير وان كان ده مهم انما قيمتي باللي انجزته وعملته في حياتي اني ممكن يوم اقعد استطلع كل حياتي السابقة الاقي فيها اكتر من شيئ ساعدت بتغيره فبالفعل انا لما أحس بجد اني مخنوقة شوية من الكلية لاني مش قادرة أشارك فيها بفاعلية كبيرة بفتكر المدرسة وقبلها والحاجات الجميلة اللي تذكرتها وانجزتها بجد شيئ جميل
انما الكلية هي طبعا مش كل شيئ فيها سيئ بس فعلا كان نفسي اقدر أغير فيها أكتر من كده كنت بتخيل ان التفاعل بينا وبين بعض المفروض يكون أكتر في المرحلة الجامعة انما الحمد لله انا مبعرفش اليأس ودي نعمة فعلا من عند ربنا والحمد لله دلوقتي بقي عندنا مدونة جميلة بنتكلم فيها ونعبر عن الي جوانا وده طبعا بالنسبة لجو الكلية شيئ متميز جدا .
انما أهم حاجة في يومي اتعودت عليها هي محاسبة نفسي قبل النوم -صحيح ان بداية اليوم شيئ مهم جدا وخاصة اننا نبدأه بطاعة لربنا ونبقى محددين هنعمل ايه بالظبط اليوم ده أكيد مش كل حاجة انما الاساسيات -انما فعلا محاسبة نفسي شيئ مهم جدا بالنسبالي وخاصة اني بهتم فعلا اني انقد ذاتي واكتشفت أهمية الموضوع ده حاليا لان كل الوقت ما بيمر بنبقى محتاجين لمقياس ذاتي اقدر أقيم نفسي على أساسه وأهم حاجة ان المحاسبة تكون شاملة لكل شيئ يعني واجباتي مع الله وبعد كده الأهل والاصدقاء وكمان شغلي وكل شيئ يشمل يومي وده كان من سنن النبي صلى الله عليه وسلم وهو انه قبل النوم يقول سبحان الله وبحمده 100 مرة وفي كل مرة يتذكر ذنب معين ليستغفر الله عنه.
أهم شيئ بالنسبالي في اليوم هو التجديد وده اللي بدأت افقده للأسف بدخولي الجامعة اني اتعلم شيئ جديد سهلة شوية بالنسبة لاني أحاول أغير من حولي وهما كمان يستفيدوا فبحاول دايما اني أعرف شيئ جديد واتعلم وفعلا النت وفرلنا قدر من التفاعل والتواصل مع الغير بشكل كبير .
بس فعلا الحمد لله انا دايما عندي أمل اني في يوم هغير وهصنع تغير معين مش مهم انه يكون كبير على الأقل أغير بيه في أهلي وأكيد بيضيع مني وقت كتير بس أكيد مش بيرجع وبندم عليه انما فعلا انا دايما بقول ان يومي جميل مقارنة بغيري لاني بحاول وده أهم شيئ ممكن مش كل الناس يتاح ليها انها تحاول علشان توصل .
